Өөрийн төлөөний үг

Өгүүлбэрийн доторх үйлийн эзний нэрийг төлөөлөн заах өөр(өө) гэдэг үгийг өөрийн төлөөний үг гэнэ. Өөрийн төлөөний үг ганц тоог заах өөрөө, олон тоог заах өөрсдөө гэсэн хоёр хэлбэртэй.

Онцлог

• Зөвхөн жинхэнэ нэрийг төлөөлөх тул тийн ялгал, хамаатуулахын нөхцөлөөр төгс хувилна.
• Ганц тоот өөрийн төлөөний үг нь өөрөө, өөр гэсэн хоёр хувилбарт үндэстэй.
• Өөрөө гэсэн хувилбар нь нэрлэхийн тийн ялгалын тэг нөхцөлийн өмнө, өөр гэсэн хувилбар нь бусад тийн ялгалын өмнө тохиолдоно.
• Өөрийн төлөөний үг нь өгүүлбэрт ихэвчлэн хамаатуулахын нөхцөлтэй хэрэглэгдэнэ. Үүний учир нь өгүүлбэрт төлөөлж байгаа зүйлээ онцлон ялгаж, лавшруулан батлах утга илтгэдэг. Жишээ нь: Тэр хүнийг би өөрөө танина.
• Төлөөлж байгаа үгээ дагаж орохдоо тухайн үг нь ямар тийн ялгалд байгаагаас нь хамаарч өөрийн төлөөний үг мөн тийм тийн ялгалаар хэлбэрждэг.