цагдаагийн үйл ажиллагааны эрх зүйн хариуцлага

Хадмал үг

[англ. liability and the police]

Тайлбар

Иргэний эд хөрөнгийн хохирлоо нөхөн төлүүлэх, сэтгэл санааны үр дагавраа арилгуулах эрхтэй холбоотой асуудал бөгөөд цагдаагийн байгууллагын үйл ажиллагааны улмаас бусдад учирсан хохирлыг хариуцах, нөхөн сэргээх, үйл ажиллагааны баталгаа, эрх зүйн хамгаалалтыг тогтоох, зарим эрх зүйн чөлөөлөлт буюу иммунитигийн талаар энэ нэр томьёоны хүрээнд судалдаг.

Үүнд гаргасан эрх зүйн зөрчлийн шинж байдлаас хамааран захиргааны, иргэний, эрүүгийн эрх зүйн хариуцлага хүлээлгэх асуудал, түүнчлэн хариуцлагаас чөлөөлөгдөх, чөлөөлөгдөхгүй байх нөхцлийг судалж хуульчлах асуудал багтана.

Тухайлбал цагдаагийн байгууллага, түүний алба хаагч нь төрийн эрх бүхий байгууллагаас гаргасан шийдвэрийг ёсчлон биелүүлснээс үүссэн хохирлыг хариуцахгүй. Цагдаагийн алба хаагч эрх бүхий дарга, захирагчийнхаа өгсөн тушаал, даалгаврыг ёсчлон биелүүлснээс үүссэн үр дагаврыг тушаал, даалгавар өгсөн дарга, захирагч хариуцна. Үүргээ ёсчлон биелүүлснээс цагдаагийн алба хаагчид учирсан эд хөрөнгийн хохирлыг цагдаагийн байгууллага төлж, гэм буруутай этгээдээр нөхөн төлүүлнэ. Эрэн сурвалжлах нууц ажиллагааны болон мөрдөн шалгах ажиллагааны явцад цагдаагийн алба хаагчийн алдаанаас бусдад учирсан хохирлыг төр хариуцах асуудлууд нь үйл ажиллагааны баталгаанд хамаарна.

Иргэнийг ял шийтгэсэн, баривчилсан, цагдан хорьсон, албан үүргээ биелүүлэхийг түр түдгэлзүүлсэн, эмнэлгийн байгууллагад байлгасан тухай хэвлэл, мэдээллийн хэрэгслээр мэдээлсний дараа уг ажиллагаа хууль бус болох нь нотлогдвол цагдаагийн байгууллага тухайн хэвлэл, мэдээллийн хэрэгслээр дамжуулан цагаатгасан тухай шийдвэрийн талаар 10 хоногийн дотор холбогдох мэдээлэл хийж залруулах үүрэг хүлээлгэж хуульчилсан бол иргэний эрхийг нөхөн сэргээхтэй холбоотой зохицуулалт.

Харин цагдаагийн алба хаагчийг албан үүрэгтэй нь холбогдуулан төрийн байгууллагаас шалгах бол захирах даргад нь урьдчилан мэдэгддэг нь иммунити тогтоож байгаа хэрэг юм. .