Захируулан холбох

Монгол хэлний өгүүлбэрийн бүтцэд орж байгаа үгс болон нийлмэл өгүүлбэрүүдийг холбох үүргийг харьцааны дохио болох бүтээвэр буюу нэр, үйлийн холбох нөхцөлүүд бүрэн гүйцэтгэж чаддаггүй байна. Өөрөөр хэлбэл, эдгээр нөхцлийн үүрэг хэлний тодорхой зүй тогтолоор хязгаарлагддаг. Ийнхүү нэрийн тийн ялгал, үйлийн холбох нөхцөлийн үл тохиолдох байранд үг, өгүүлбэрийг холбох үүрэг гүйцэтгэдэг туслах үгийг захируулан холбох үг гэнэ.

Гишүүнийг захируулан холбох үгс

• Орчим, гаруй, шахам, дахин, удаа, хавьцаа, эргэм, шиг, мэт, адил, чинээ, тушаа, турш, бүр, тухай, талаар, хүртэл зэрэг үгс голдуу өгүүлбэрийн нэг гишүүнийг нөгөө гишүүнд захируулан холбоно. Жишээлбэл: Дал орчим насны нэгэн буурал олон хүүхэд тойруулан суулгаад үлгэр ярьж эхлэв.

Өгүүлбэрийг захируулан холбох үгс

• Тулд, төлөө, учир (учраас), улмаас, дагуу, сацуу, зэрэгцээ, ялдамд, далимд, хэрд гэсэн үгс нь угсарсан нийлмэл өгүүлбэрийн гишүүн өгүүлбэрийг гол өгүүлбэрт нь захируулан холбох үндсэн үүрэгтэй. Жишээлбэл: Донров холын муу санаа өвөрлөж явсан тул түүний хэлснийг их л эмзэглэн хүлээж авав.