Монгол хэлний үг бүтээх, шинэ үг үүсэх аргуудаас хамгийн бүтээлч идэвхтэй хэлбэрийн нэг нь үг нийлж бүтэх арга юм. Үг нийлж бүтэх нь угсран нийлэх, зэрэгцэн нийлж бүтэх гэсэн хоёр хэлбэртэй. Монгол хэлний шинэ үгийн бүрэлдэхүүнд угсран нийлсэн нийлмэл бүтэцтэй үг хэллэг их байгаа нь монгол хэлний үг бүтээх аргын нэг болох нийлэг арга, хэрэглүүрээс задлаг арга илүү бүтээлч болж байгааг харуулж байна. Жишээ нь: Гар утас, цагаан утас, мяннгат малчин, зайн сургалт, төлөөлөн удирдах зөвлөл, амиа золиослогч, сонгуулийн тойрог, оюуны чадавх, эмзэг бүлэг, хараар амьдрах, мөнгө угаах гэх мэт.
Нийлмэл бүтэцтэй шинэ үгийн дотор харь үг, уугуул үгтэй нийлж бүтсэн нь цөөнгүй байдаг. Тухайлбал: Шилэн кабель, хөрөнгийн бирж, сансрын антень, хэрэгжүүлэгч агентлаг, стресс тайлах, кайф авах, блиц ярилцлага, сити такси, фото мисс, брокерын пүүс, телефон банк гэх мэт.
