цагдаагийн синик үзэл

Хадмал үг

[англ. cynicism, police]

Тайлбар

“Cynic” гэх үг нь МЭӨ 5 дугаар зууны үед амьдарч байсан, Сократын шавь болох Антистэнисийн бий болгосон эртний Грекийн философийн урсгалын нэрнээс гаралтай. Угтаа бол тэдний амьдарч байсан газрын нэр нь философийн урсгалын нэр болжээ.

Үгийн утга нь юманд салан задгай хайхрамжгүй, биеэ үгүйсгэдэггүй, хуншгүй гэх мэт ичгүүргүй хүнийг үл таашаасан хэллэг болох “увайгүй” гэж орчуулагддаг.

Police cynicism гэдэг нь дэлхий ертөнц даяар гэдэггүй юмаа гэхэд эрүүгийн хэрэг хянан шийдвэрлэх тогтолцооны хувьд нэгдмэл ойлголттойгоор цагдаа судлалын хүрээнд хэрэглэдэг байгууллагын соёлын асуудал. Энэ ойлголт нь бусад салбар шинжлэх ухаанд ойлгож хэрэглэдэгээс бага зэрэг өөр.

Товчхондоо идеализм, үнэн, шударга ёс, тэр ч байтугай цагдаагийн тангарагтаа эргэлзэл, үгүйсгэлийг давхар тээж явдаг сөргөх үзэл гэж тодорхойлж болно.

Шалтгаан нь залхаасан, дээрэлхүү ёс бус харилцаа, хариуцлагаас зугатаан аргацаасан, цаг нөхцөөсөн, “гал алдчихгүй шиг л явья” гэсэн удирдлагын муу менежмент, ажлын ачаалал, стресс бухимдал, цалин хангамжийн таагүй нөхцөл, ирээдүйдээ итгэх итгэл сулрах, карьерын тогтолцооны шударга бус байдал, боловсролын түвшин зэрэг байж болох бөгөөд авлига, хээл хахуульд автах суурь болохоос гадна судалгаагаар ийм үзэл санаа нь тухайн хүнийг нийгмээс тусгаарлах-зугатаах, идеализмыг жигшин үзэгч болгодог байна. Бидний ярьдагаар “дөжирчихсөн” этгээд болдог бөгөөд иргэдэд болон өөрийнхөө удирдлагад байгаа хүмүүст дээрэнгүй хандах, үл хүндлэх, дээрээс өгсөн үүрэг даалгаварыг үл биелүүлэх зэргээр илэрнэ.

Цагдаагийн ерөнхий газрын 2016 оны эхний хагас жилийн тайлангаас үзэхэд харилцааны ёс зүйн зөрчил 60 орчим хувиар, үүрэг, даалгавар үл биелүүлсэн зөрчил урд жилийнхтэй харьцуулахад 3 дахин өссөн байгаа нь “синисизм”-ийн талаас нь судлах шаардлагатай гэдэг нь харагдаж байна.