канадын цагдаагийн байгууллагын үйл ажиллагаа

Хадмал үг

[англ. canadian policing]

Тайлбар

Канад Улсын цагдаагийн байгууллага барууны хөгжилтэй орнуудын Цагдаагийн үйл ажиллагааг улсынхаа онцлог уламжлалд нийцүүлэн мэргэжлийн үйл ажиллагаа явуулдаг. Канадын цагдааг зөвхөн улаан хүрэм өмсөж морь унасан алба хаагчаар төсөөлөх нь өрөөсгөл. Канад Улсын цагдаагийн байгууллагын үйл ажиллагааг ярихын өмнө түүхийн нугачаан дунд тус улс нь Их Британи болон Франц улсын колони болж байсан гэдгийг санах хэрэгтэй. Энэ хоёр их гүрний нөлөө одоо ч Канад улсын тогтолцоо, соёл, заншил, шашин, хэл, хуулийн системд тод мөрөө үлдээсэн. Кьүбик, Нью Брунсвик зэрэг мужид Францын нөлөө хамгийн их ажиглагддаг. Харин Их Британийн нөлөө Канадад суудаг байсан Их Британийн төлөөлөгчийн газраар дамжин Канадын төрийн байгуулалт, цагдаагийн үйл ажиллагаанд нөлөөлжээ. Лондон хотын Цагдаагийн газрын үйл ажиллагаандаа баримталдаг зарчим, үйл ажиллагааны ижил хувилбарыг Канадын Цагдаагийн үйл ажиллагаанаас тод харж болно. Ирландын Вант улсын Цагдаагийн газрын нөлөө Канадын цагдаагийн үйл ажиллагаанд бий. “Chief Constable” буюу одоогийн цагдаагийн газрын дарга нь Их Британийн нөлөө орсон гэдгийг илэрхийлэх хамгийн том илрэл нь юм. Дэлхийн I, II дайны үед Канадын цагдаагийн бүрэлдэхүүнд халагдсан цэргийн алба хаагчид орж ажиллах явдал их байсан нь Канадын цагдаагийн үйл ажиллагаанд нөлөөлсөн гэж үздэг.

1932 онд Алберта, Манитоба, Нью Брунсвик, Принс Эдвард Айланд, Нова Скоттын мужууд RCMP буюу Хатан хааны морьт цагдаагийн албанд нэгдэх гэрээнд гарын үсэг зурсан. Саскатүүнчүүд 1928 онд энэ гэрээнд нэгдэж байсан. Дайны дараагаас эхлэн техник технологийн дэвшлийг Канадын цагдаагийн байгууллага өргөнөөр ашиглах болсон. 1980-аад оноос Олон нийтэд тулгуурласан цагдаагийн үйл ажиллагаа явуулдаг болсон бөгөөд өнөө үед асуудалд суурилсан цагдаагийн үйл ажиллагаа руу шилжсэн гэж үздэг.

Канад Улсын Эрүүгийн хуулийн үйлчлэх цар хүрээ цагдаагийн байгууллагын үйл ажиллагаанд ихээхэн нөлөөлдөг болохыг дурдах хэрэгтэй. Холбооны Засгийн газар Эрүүгийн хуулийг батлан хэрэгжүүлэх, хар тамхи мансууруулах бодисын хяналтын хууль, терроризмтой тэмцэх, олон нийтийн аюулгүй байдлыг хангах цагдаагийн бусад үүргийг хүлээдэг. Канадын цагдаагийн алба хаагчдын хэрхэн үүргээ биелүүлэх чиглэлийг Канадын Хүний эрхийн тунхаг тодорхойлдог. Муж бүр өөрсдийн баталсан хуулийн дагуу байгуулсан цагдаагийн албадтай.