гэмт хэргийн лаборатори

Хадмал үг

[англ. crime laboratory]

Тайлбар

Аливаа гэмт хэргийг мөрдөх явцад нотлох баримтыг зөв тодорхойлж, шалгах нь мөрдөн шалгах ажиллагаанд маш чухал юм. Учир нь цагдаагийн алба хаагчид нотлох баримтын дагуу сэжигтнүүдийг баривчилж, улмаар тэдгээрт ял тулгадаг. Иймээс гэмт хэргийн лаборатори нь нотлох баримтад шинжилгээ хийх хамгийн сүүлийн үеийн техник технологийг дотроо агуулж байдаг бөгөөд маш чадварлаг, эрдэмтэн судлаачдаар дүүрсэн байдаг.

Шинжлэн магадлахуйн ухаан гэдэг нэр томьёо нь шинжлэх ухааныг хууль эрх зүйн хүрээнд хэрэглэж, нотлох баримтад магадлан шинжилгээ хийхийг хэлдэг. Ийм төрлийн шинжилгээ хийдэг шүүх шинжээчид голдуу гэмт хэргийн лаборатори дотор ажилладаг. Одоогийн байдлаар шинжлэн магадлахуйн ухаан нь харьцангуй шинэ салбар ухаан учраас өөрчлөгдсөөр л байгаа. Тухайлбал, өнөөдрийн гэмт хэргийн лаборатори дотор маш олон мэргэжилтнүүд ажилладаг. Гэтэл, урд өмнө нь ийм байгаагүй. Үүнийг тайлбарлавал, хэдхэн жилийн өмнө нэг шинжээч бүх төрлийн шинжилгээг хийдэг байв. Тэрээр төрөл бүрийн нотлох баримтын шинжилгээг ерөнхийд нь авч үзэж, шинжилгээ хийдэг байсан бол, өнөөдөр бүх шинжлэх ухаан улам нарийсаж байгаатай холбогдуулан лаборатори дотор төрөл бүрийн нарийн шинжилгээ хийдэг мэргэжилтнүүд бий болсон байна. Жишээлбэл, урд өмнө нь ганцхан шинжээч цусны толбо, цусан дахь спиртийн агууламж, мансууруулах бодис, гэмт хэргийн газраас олдсон үс болон сүлжмэл утсанд шинжилгээ хийдэг байсан бол, өнөө үед токсилоги (буюу хорт бодис) болон серологи (буюу хүний биеийн шингэнд) шинжилгээ хийдэг нарийн мэргэжилтнүүд байдаг болсон байна.